Egin klik hemen INPRIMATZEKO

Elkartegintzaren maratoia

Jasone Mendizabal / Hizkuntza / 2008-02-12 / 07:00

Hitzarmengintzaren bidez elkarteak euskaldunduz idatziarekin herrietako elkarteak euskalduntzeko ahaleginean dabiltzan Euskara Elkarteen lana azpimarratzea izan da nire helburua. Hori dela eta atera nahi izan dut elkarteon izenen zerrenda argitara, eta horixe da baita ere beste idatzitxo hau bidaltzera bultzatu nauen arrazoia; aurrekoan bidalitako zerrendan Euskara Elkarte bat falta dela konturatu orduko akats hori zuzendu gura izatea, hain zuzen ere.

Badira dagoeneko zazpi urte Irun Iruten Euskara Elkartea Irungo 54 elkarterekin lanean hasi zela bertako Udalak sustatutako "Kalean Bai" planaren baitan. "Kalean Bai"ren helburua Irungo 3-25 urte arteko haur eta gazteei eskola orduz kanpo eskaintzen zaizkien jarduerak euskalduntzea da. Zazpi urte hauetan zenbait elkarte desagertu dira eta beste zenbait sortu, baina planaren bilakaera positiboa izan da eta urteak pasa ahala elkarteen parte hartzea ugaritu da. Dagoeneko 68 dira "Kalean Bai" familia osatzen duten elkarteak eta hauetatik 32rekin hitzarmen espezifikoak diseinatu dira. Hauek garatzen badute nahikoa lan Irungoek.

Zazpi urtetako lanak emandakoaz galdegin diot Irun Iruteneko teknikariari eta zinez interesgarriak eta baikorrak dira emaitzak:

• Irungo elkarteek "Kalean Bai" plana onartuta eta barneratuta dute eta horren seinale dira elkarte parte hartzaileen gorakada, eskaintzen diren zerbitzuen (itzulpen eta abarrak...) eskariek ere gora egin izana eta hizkuntza paisaian ematen ari diren aldaketa nabarmenak.
• Hizkuntza ohiturak, poliki bada ere, aldatzen doaz. Arlo honetan, epe luzerako ikuspegia eta lan jarraia egitea ezinbestekoak dira.
• "Kalean Bai"ren bidea markatzen dutenak dagoeneko elkarteak dira. Parte hartzaileak dira beraien beharrak agertuz planaren baitan egin beharreko lanen erakusle.
• Elkarteen eta eragileen arteko elkarlana estua da.
• Elkarteek beraien buruaz duten ikuspegia apurka-apurka aldatuz doa: beraien bazkideetako asko euskaldunak direla (beraiek uste zutena baino gehiago) jabetzeko balio izan die baita ere planak. Gainera, euskararen erabilera hobetu ahala bazkideon esker ona ere jaso dute.

Hauxe da Irungo esperientzia, honelakoa edo antzerakoa izango da beste hainbat herritan egiten ari direna. Epe luzerako lana dugu beraz elkarteetan eragiten eta maratoietan bezala, norberaren erritmoa ondo planifikatu eta finkatzea garrantzitsua izango da, bakoitzaren gaitasunen, aukeren eta baliabideen arabera, herriz-herri eta elkartez-elkarte.

(JASONE MENDIZABAL ALTUNA Topaguneko zuzendaria da)

Inprimatu