|
Egin klik hemen INPRIMATZEKO |
erabili.com / Herri-administrazioa / 2009-05-13 / 09:05
Patxi Lopez buru duen Eusko Jaurlaritza berriak atzo (2009-5-12) baieztatu zituen sail ezberdinetako goi karguen izenak. Hizkuntza Politikarako Sailburuordetza (HPS) Ramon Etxezarreta PSE-EEko kide gipuzkoarraren eskuetan egongo da aurrerantzean.
Ramon Etxezarretak (Urrestilla, 1954) Donostiako Udalean bete du bere ibilbide politikoaren tarterik zabalena. 1995etik 2007ra izan zen zinegotzi Donostian. 2007ko udal hauteskundeetan ez zen sozialisten zerrendetan aurkeztu, baina Gipuzkoako hiriburuko Udalean jarraitu du lanean gaur arte, Kultura ordezkari lanetan. Donostiako zinegotzi izan zen bitartean, Kultura eta Euskara Batzordeko buru izan zen; hizkuntz normalizaziorako politikak abian jarri zituen, besteak beste.
Alderdi sozialistaren zerrendetan aurkeztuta Donostiako Udalera iritsi aurretik, Azpeitikoan ere izan zen zinegotzi Etxezarreta 1979etik 1987ra, orduan Euskadiko Ezkerrako ordezkari bezala. Donostiako zinegotzi izendatu aurretik, Gipuzkoako Foru Aldundian itzultzaile lanak egin zituen HPSren arduradun berriak. Horretaz gain, idazlan batzuk ere baditu argitaratuak, besteak beste Hiztegi erotikoa.
Etxezarretak Patxi Baztarrika jeltzalearen tokia hartuko du Eusko Jaurlaritzaren Hizkuntz Politikarako sailburuorde gisa. Baztarrikak 2005etik hona bete du kargua.
 | Inprimatu |