|
Euskara-gaitasun tituluen baliokidetzarako Dekretua indarrean sartu delarik, guztira 9.747 (iaz baino 2.000 gehiago) euskara ikasle ari dira parte hartzen EAEko hiru lurraldeetan egiten ari diren HABEren 2008ko lehenengo deialdiko azterketetan, 1., 2. , 3. eta 4. mailak lortzeko asmoz.
Horietatik 7.132 ikasle 1. eta 2. maila erdiesteko aurkeztu ziren aurreko asteburuan. Azken larunbat honetan (2008-5-24), berriz, 2.616 ikasle aurkeztu ziren 3. maila lortzeko azterketara. Horien artean bizkaitarrak ziren ugarienak: 1.606; gero gipuzkoarrak datoz, 712; eta arabarrak, 297.
Lehen aldiz baliokide
Orain arte, HABEk emandako euskara gaitasun egiaztagiriek ez zuten administrazio publikoetan lan egiteko balio. Ostera, Dekretu honi esker euskaltegietako ikasketen harian HABEk emandako lau mailetako egiaztagiriek balio ofizial osoa izango dute.
2008ko apirilaren 18tik indarrean dagoela, atzeraeragina duen Dekretu honek Europako Kontseiluak onartutako Hizkuntzen Europako Erreferentzia Markoaren B-1, B-2, C-1 eta C-2 mailekin parekatzen ditu IVAP-ek, HABEk, Osakidetzak, Ertzaintzak eta Hezkuntza Sailak emandako agiriak, bakoitzaren baliokidetzak ezarriz.
Hala, lehenbiziko aldia izango da HABEren 3. maila lortzeko azterketa EGAren eta IVAP eta Osakidetzaren 3. Hizkuntza Eskakizunen eta Ertzaintzaren 2. Hizkuntza Eskakizunaren balio berekoa izango dela. Ekainaren 14an, berriz, HABEren 4. maila lortzeko azterketa egingo da (72 ikasle aritu dira aurten), saio modura hirugarren urtea baita zazpi euskaltegitan maila hau ematen dena. Konbalidazio dekretuaren ondorioz, HABEren 4. maila IVAP eta Osakidetzaren 4. HE-ren balio berekoa izango da.
Euskaltegien lanari aitortza
HABEko zuzendari nagusi Joseba Erkiziak azpimarratu duenez, "konbalidazio dekretuaren eragina oso positiboa izan da, izan ere euskaltegietan ari diren herritarretan jende gehiago animatu da azterketak egitera, balio ofizial osoa eta baliokidetza aitortu zaizkielako HABEren egiaztagiriei, eta horrek eragin positiboa izango du haien ikas-prozesuan; gainera, euskaltegien lanari merezi zuen aitortza ematen zaio horrela eta, azken batean, euskaltegietan zerbitzu osoagoa eskaintzen da"
Hauek dira Dekretuak ontzat eman dituen baliokidetzak:
| Europako Erreferentzia Markoa | IVAP | HABE | OSAKIDETZA | ERTZAINTZA | HEZKUNTZA SAILA |
|---|
| B1 | 1. HE | 1. maila | 1. HE |
|
| | B2 | 2. HE | 2. maila | 2. HE | 1. HE |
| | C1 | 3. HE | 3. maila | 3. HE | 2. HE | EGA | | C2 | 4. HE | 4. maila | 4. HE |
|
|
|
