Egin klik hemen INPRIMATZEKO

Elkarteak eta txokoak: idazteko ereduak eta argibideak

Maddi Etxebarria (Elhuyar Aholkularitza) / Hizkuntza / 2008-01-07 / 07:00

CD horretan, euren funtzionamendurako lagungarri diren ereduak jasotzen dira: batzar-deiak, aktak, ziurtagiriak, zerrendak, esaldi erabilgarriak, txokoetako hileko erreserbak... Horretaz gain, argibideen atal bat ere sartu da: data zelan idatzi, zenbakiak, Interneten aurki daitezkeen hainbat baliabide... Hori guztia, modu errazean eta erabilgarrian.

Horregaz batera, liburuxka bat ere banatu du, Geurien be bai egitasmoaren inguruko azalpenak jasotzen dituena, baita Bermeoko euskararen erabilerari buruzko hainbat datu ere. Azkenik, elkarte eta txokoan euskararen erabilera handitzeko hainbat proposamen egiten dira.

Geurien be bai

Geurien be bai Bermeoko enpresa eta elkarteak euskalduntzeko egitasmoa da, Bermeoko Udalaren Euskara Sailak 2004. urtean martxan jarritakoa.

Helburua

Proiektu honen helburu nagusia Bermeoko arlo sozio-ekonomikoan eta elkarteetan euskararen erabilera bultzatuko duen plana garatzea da, enpresa eta elkarte bakoitzaren behar eta ezaugarrietara egokitua.

2007ko lanak

Udaberri inguruan, elkarte eta enpresa guztiak bisitatu genituen, urtero legez hitzarmena berritzeko asmoz, eta zertan lagun genezakeen jakiteko.

Elkarteetako arduradunekin egoera aztertu ostean, eragiteko eremu bi ikusi genituen:

• Bata, kirol-taldeetako monitore eta entrenatzaileak. Izan ere, horiek dira herriko gaztetxuekin harreman zuzena duten pertsonak. Egitasmoan parte hartzen duten kirol-taldeak kontuan hartuta, herriko umeen herenak gutxi gorabehera, kirolen bat egiten du. Hori dela eta, monitore eta entrenatzaileei zuzendutako sentsibilizazio-kanpaina bat jarri dugu martxan. Monitore edo entrenatzaileek erantzukizun handia dute hizkuntza markatzerakoan. Izan ere, eurek dira haurren edo gazteentzako ereduak, beraz entrenamenduetan entrenatzaileak euskaraz egiten badu, haurrek ere euskaraz egingo dute. Monitorea da eredua. Beraz, kirolean aritzen diren haurrak eta gazteek euskaraz egin dezaten entrenatzaileek edo monitoreek entrenamenduetan euskaraz aritzea beharrezkoa da, taldean euskaraz hitz egiteko ohitura zabaldu dadin. Horregatik, eta kirolaren guztiz lotuta lelo hau erabili dugu: Euskaraz, denok irabazle!

  Egitasmoan dauden kirol-taldeetako monitore eta entrenatzaileen artean eskuko orri bat eta egutegia banatu ditugu.

• Bestea, elkarte eta txokoetan erabiltzen diren idatzizko ereduak. Sarri, euskarazko eredurik ez dugu izaten, eta aurretik duguna erabiltzen dugu. Hori dela eta, elkarte eta txokoetan sarrien erabiltzen diren dokumentuak jaso ditugu. Horretaz gain, elkarte eta txokoentzako Udalak eskaintzen dituen laguntzak batzen dituen eskuko orri bat ere atera dugu.

Ereduak

Orain arte aipatutako idatzi-eredu eta material batzuk ikus ditzakezue jarraian, bakoitzaren gainean sakatuz:

• Akta eredua
• Hileko erreserba-orri eredua
• Prezio zerrenda eredua
• Kirol entrenatzaile eta monitoreei zuzendutako gutuna eta egutegia

(MADDI ETXEBARRIA BILBAO Geurien Be bai egitasmoko teknikaria da)

Ildo bereko artikuluak (ikusteko gainean sakatu)

• Euskararen sinadurak

Inprimatu