Egin klik hemen INPRIMATZEKO

Ordizian ere Lanean euskaraz

Ordiziako Euskara Zerbitzua / Enpresa / 2007-02-05 / 07:00

Lanean programari 2005ean eman zitzaion hasiera, lan-munduan euskara sustatzeko. Ordiziako udalak bultzatzen duen ekimena da eta Elhuyar Aholkularitza enpresa arduratzen da aholkularitza teknikoaz.

Zenbakiak eta asmoak

2005ean bederatzi enpresa sartu ziren programan, 116 langile guztira.

2006an zazpi enpresa sartu ziren, 114 langile guztira.

Hauek dira aipatutako enpresa horiek:

2007an beste zazpi enpresari luzatuko zaie planean sartzeko gonbidapena. Bisitak egiten hasiko gara laster. Prozesu hori amaitutakoan jakinaraziko dizkizuegu zazpi enpresa horien datuak.

Ezaugarriak eta urratsak

Jarraian, proiektuarekin lotutako hainbat aipamen luzatuko dizkizuegu:

• Enpresek haien borondatez hartzen dute parte. Udalak aholkularitzaren kostu osoa laguntzen du diruz.
• Planak enpresa bakoitzaren ezaugarri eta erritmoetara egokitzen dira. Ez zaie aurre baldintzarik jartzen, baina hartzen dituzten konpromisoak betetzeko ahalegin zintzoa egin behar dute.
• Hasierako urratsak errazenak eta eraginkorrenak izaten dira. Normalean, irudi korporatiboaren aldaketekin hasten gara: fakturak, inprimakiak, gutun-azalak, bisita-txartelak, zorroak eta abar itzuli eta ele bietan edo euskaraz jartzen dira. Ondoren, errotuluak, ibilgailuen errotulazioa eta abarri heltzen zaie; horrela, hizkuntza paisaiako elementu guztiak aldatzea lortzeko.

  Inprentara eraman behar diren elementuak amaitu ahala aldatzen dira. Esate baterako, enpresa batek albaranak aldatzeko erabakia hartu du, baina orain artekoak amaitu ondoren egingo du aldaketa. Horrek batzuetan zaildu egiten du emaitzak epe motzean ikustea.

• Hizkuntzaren erabilerarekin (ahozkoa eta idatzizkoa) lotutako aldaketak zailagoak dira, tokian tokiko langileen hizkuntza-gaitasunaren eta denbora edo gogoaren mendekoak izaten baitira. Une honetan hiru enpresatako hiru langile ari dira euskara klaseak hartzen.
• Aipatu beharra dago enpresa txikietan atzerriko gero eta langile gehiago ari direla lanean. Gai horrek arreta berezia merezi du, lantoki askotan ezinezkoa zaielako hizkuntza-irizpideak kontuan hartzea.
• Orokorrean nahiko enpresa txikiak dira, bai baliabide aldetik baita denbora aldetik ere oso mugatuak daudenak. Plan honetan elkartzearen ondorioz, bakarrik lortu ahal izango ez zituzten hainbat abantaila lortu dituzte: euskara-plana beraren finantziazioa, trebakuntzaren finantziazioan laguntza, komunikazio aldetik...

Bi adibide

Ondorengo bi koadroetan, Lanean programa garatzen ari diren bi enpresen adibideak ikus ditzakegu: enpresen ezaugarriak, euskara-plana garatzen hasi aurretik hizkuntza erabileraren aldetik zeukaten egoera, zehaztutako helburu nagusia eta hori lortzeko ezarritako urratsak.

Hobeto ikusteko, handituta ikusi nahi baduzu, gainean sakatu.

Hobeto ikusteko, handituta ikusi nahi baduzu, gainean sakatu.

Programaren berri ematen duen liburuxka

Lanean programaren berri eta hizkuntza normalizazioarekin lotutako kontuak jasotzen dituen liburuxka bat ere argitaratzen dugu. Liburuxka hori enpresa guztietako langileei banatzen diegu, planean sartuta egon ala ez. Gainera, DIN-A3ko ale bana bidaltzen dugu enpresetara, beraien oholtzetan jar ditzaten. Herriko hainbat erakundetan ere jartzen ditugu, herritarrek ikus ditzaten.

Enpresa batek bestearen berri jakitea da liburuxkaren bidez lortu nahi dena, langileak jakinaren gainean egotea eta motibazioa eta autoestimua handiagotzea. Bide batez, bezero posible horiek ere jakinaren gainean jarri eta beraiek era beren aletxoa egitea, euskaraz eska dezaten, eta abar.

Lanean programaren liburuxkaren bigarren alea HEMEN ikus dezakezue.

(ORDIZIAKO EUSKARA ZERBITZUA)

Inprimatu