Ereduzko Prosaren corpusak 18 milioi hitz amaraunean

Ereduzko Prosa Gaur Interneteko testu arakatzaileak bere corpusa gizentzen jarraitzen du etengabe. Herria astekariko aleak eta 61 liburu gehitu dizkiote arakatzaileari joan den azaroaren 14an eginiko azken eguneratzean eta, horrenbestez, 18 milio hitzen kopurua gainditu du corpusak. Ereduzko Prosa Gaur-ek amaraunean euskarak duen corpusik handiena dauka bere baitan.

Ereduzko Prosa Gaur egitasmoak egungo euskara ereduzkoaren erakusgarri zabala eskaintzen du. Aurrekoren bat tartean bada ere, gehienbat 2000. urtetik aurrerako testu eredugarriez osatzen da. Azken eguneratzearen ondoren, 18.218.320 hitz biltzen ditu, 214 liburutan (9,4 milioi hitz), 2004ko Berria egunkariaren aleetan (6,6 milioi hitz) eta 2001-2005 bitarteko Herria astekariaren aleetan (2,1 milioi hitz) banatuta.

Amaraunean euskarak duen testu-corpusik handiena dugu Ereduzko Prosa Gaur . EHUko Euskara Zerbitzuak 2003an abiarazi zuen proiektu hau eta Ibon Sarasola hizkuntzalari, euskaltzain eta aipatu zerbitzuko kidea da egitasmoaren zuzendaria, Xabier Alberdi, Jesus Mari Makazaga, Iñaki Ugarteburu eta Juan Garzia laguntzaile dituela. Donostiako Udala da proiektuaren babesle, bere Euskararen Udal Patronatuaren bidez.

Hazkunde handia hilabete gutxitan

2003ko azaroan amaraunean jarri zutenean 4,2 milioi hitz zituen Ereduzko Prosa Gaur aztergailuak. 87 libururekin, jatorrizkoak zein itzulpenak, ekin zion bideari EHUko Euskara Zerbitzuaren egitasmo honek.

Bi urteren buruan, ia laukoiztu egin da euskarazko testuen arakatzailearen corpusa. Hazkunde nabarmen hori, gainera, 2005. urtean gertatu da. 2004an egitasmoaren arduradunek ez zuten arakatzailea eguneratu, baina aurten dagoeneko hiru eguneratze egin dituzte:

• 2005eko otsailean 157 liburu gehitu ziren zerrendara (nobelak, saiakerak eta itzulpenak) eta, horrenbestez, 7 milioi hitzen muga gainditu zuen arakatzailearen corpusak.
• 2005eko maiatzean 13,5 milioi hitz izatera iritsi zen Ereduzko Prosa Gaur , Berria egunkariaren 2004ko aleak gehitu ostean.
• 2005eko azaroan, orain aurkeztu duten azken eguneratzean, 18 milioi hitzen muga gainditu du.

Hamar hilabeteren barruan, beraz, 10 milioi hitz gehiago bereganatu ditu amaraunean dugun euskarazko corpusik handienak, haserako 4,2 haietatik 18,2raino iritsiz.

Liburu berrien zerrenda

Azken eguneratzean, esan bezala, Herria astekariko aleak eta 61 liburu gehitu dizkiote Ereduzko Prosa Gaur arakatzaileari.

Jarraian datorrena da liburu berrien zerrenda osoa:

Hiztegia egiteko asmoa

Eguneratze gehiago egingo dituzte aurrerantzean ere ereduzko euskararen arakatzailearen arduradunek, aplikazioaren gainean hainbat lan eginez.

Aurrera begirako asmoen artean, ordea, beste bat nabarmendu behar da. Izan ere, Ereduzko Prosa Gaur arakatzailearen arduradunek beraien azken helburua corpus horren gainean eraturiko hiztegia egitea izango dela aurreratu dute.

Ildo bereko artikuluak (irakurtzeko sakatu gainean):

• Ereduzko euskara esku-eskura
• Amaraunean euskarak duen corpusik handiena
• Ereduzko euskararen corpusa handituz

Inprimatu

Erantzun