|
Euskararen alde hartutako konpromisoen aitortza egin zaie entitate horiei Berako kultur etxean egindako ekitaldian. Bertan izan dira Vicente Arotzena Bortzirietako Mankomunitateko Lehendakaria, Pello Apezetxea euskalgintzako ordezkaria, Iñaki Pikabea Ziurtagiriduna, Iker Igoa Euskararen Mankomunitateko ordezkaria eta Xabier Mendiguren Kontseiluko Idazkari Nagusia.
Bai Euskarari Akordioa Bortzirietan abian jarri zenetik eskualdeko euskalgintza prozesua gidatzen aritu da. Pello Apezetxea euskalgintzako ordezkariren hitzetan “eskualdean euskarekiko konpromisoak hartu dituzuenok lan ederra egin duzue. Baina euskarekiko lana ez da hemen bukatzen; konpromiso horiei eutsi egin behar zaie, eta konpromisorik hartu ez dutenengana iritsi egin behar da”.
Vicente Arotzena eta Iker Igoa Euskara Mankomunitateko ordezkariek zoriondu egin dituzte Bai Euskarari Ziurtagiria jaso dutenak; Iker Igoak esan duenez “Bera, Lesaka, Etxalar, Igantzi eta Arantzako udalek argi dugu euskararen normalizazioaren aldeko prozesuan eginkizun garrantzitsua dugula herri-erakundeok”.
Bai Euskarari Ziurtagiria jaso duten era guztietako entitateen izenean hitz egin du Iñaki Pikabeak. Bere ustez “denon artean Bortzirietan euskaraz bizi, ikasi, lan egin, erosi, irakurri, etab. gero eta errazago egingo dugu. Hemendik aitzinera gure esku gelditzen da hitzez hartu ditugun konpromisoak zinez betetzea”.
Xabier Mendiguren Kontseiluko Idazkari Nagusiak esan du denon parte-hartzea beharrezkoa dela euskararen normalizazioa lortzeko eginkizunean. “Dagoeneko 847 dira Euskal Herrian Ziurtagiria dutenak eta euskararen alde hartu duten konpromisoa erakusten dutenak gizartearen aurrean”.
(NEREA PIKABEA AMUNDARAIN Kontseiluko komunikazioburua da)
|
