|
Egin klik hemen INPRIMATZEKO |
Azpeitiko Udal Euskaltegia / Euskaltegia / 2009-10-19 / 12:33
Azpeitiko Udal Euskaltegiak 25. urteurrena ospatuko du ikasturte honetan. Ekaina bitartean garatuko diren hainbat ekintzetan gauzatuko dira ospakizunak. Aurrena, ostegun honetan bertan, urriaren 22an, izango da, eta Asisko Urmenetaren eskutik etorriko da.
Cómo aprender euskera en 40 años y un día, fácilmente izenburupean, hitzaldia emango du Asisko Urmenetak datorren ostegunean, Udal Euskaltegiaren egoitzan (Perdillegi, 1). 15:30ean izango da hitzordua.
Aurrez beste hainbatetan eta beste hainbat tokitan eskainitako saioetan egin bezala, nafar komikilari ezagunak marrazkiekin lagunduko du bere jarduna. Hitzaldiaren izenburuak adierazten duen moduan, umorerik ez da faltako Urmenetaren jardunean. Eta, izenburuarekin jarraituz, hitzaldia bereziki euskara ikasten ari direnei edota euskaldunberriei zuzendutakoa bada ere, Udal Euskaltegiko arduradunek ekitaldia irekia izatea aurreikusia dute. Beraz, euskaltegiko ikasleek ez ezik, bertaratu nahi duen herritar orok ere badu aukera Asisko Urmenetaren hitzaldia jarraitzeko.
Urmenetaren hitzaldiarekin irekiko da, beraz, sortu zeneko 25. urteurrena dela-eta Azpeitiko Udal Euskaltegiak 2009-2010 ikasturtean eskaini asmo dituen ekitaldi berezien egitaraua. Datozen hilabeteetan ere izango dira hitzorduak eta, aurreneko hau bezala, ekitaldi guztiak irekiak izatea da euskaltegiko arduradunen asmoa. Hain zuzen ere, Euskal Antzerki Topaketen barruan kokatuko da hurrengo zita. Honen berri zabalagoa emango dugu, bere garaian.
 | Inprimatu |