Egin klik hemen INPRIMATZEKO

Hizkuntzen funtzionaltasun eremuak enpresatan

Azpeitiko Euskara Patronatua - AEP / Enpresak / 2007-07-10 / 12:30

Enpresen eguneroko jardunean hizkuntza bat baino gehiago erabiltzen dira. Enpresen errealitatea gero eta eleaniztunagoa da eta beraz, hizkuntzak egoki gestionatzen asmatzea behar-beharrezkoa da. Txinako hornitzaileekin aritzeko txinera erabiltzen dute. Alemaniako bezeroekin aritzeko alemana. Brasilen duten planatako langileekin portugesa. Japonesekin ingelesez... Egoera horiek gero eta ohikoagoak dira eta izango dira.

Azpeitiko enpresetan ingelesa, alemana, portugesa, txinera... erabiltzen dira. Baina horiekin batera, nola ez, euskara eta gaztelania ere bai. Hizkuntzak baliagarriak eta erabilgarriak dira enpresako egunerokotasunean funtzioren bat betetzen duten neurrian. Eta horixe da, hizkuntzen gestiorako planen helburua: enpresaren jardunean hizkuntza bakoitzari dagokion funtzioa aurkitzea eta eremu funtzional bakoitzerako hizkuntza bakoitzaren erabilera arautzea.

ELEGUNE zerbitzuaren bidez euskararen erabilera handitu nahi dugu enpresako hizkuntza guztiak kudeatuz. Bistan denez, Azpeitiko enpresetan euskarak funtzio asko bete ditzake:

• Ahozko eta idatzizko barne harremanetan: langileen artean, nominetan, kontratuetan, txostenetan, aurkezpenetan, bileretan...
• Ahozko eta idatzizko kanpo harremanetan: Azpeitiko eta Euskal Herriko hornitzaileekin eta bezeroekin, erakunde publikoekin (udalak, foru aldundiekin...), banketxeekin, gainerako enpresekin...
• Informatikan: sistema eragileak, intranetak, bulegotikako programak...
• Kanpo eta barne irudian. Errotuluetan, logotipoetan, karpeten etiketetan...

Elegunek PDCA zikloari jarraituz honako urrats hauek ematen ditu gure zerbitzua jaso nahi duten enpresetan:

• Diseinua: Enpresako hizkuntza egoeraren diagnostikoa egin behar da lehenik. Ondoren, helburu estrategiko egokiak definitu. Eta azkenik, helburu estrategiko horiek lortzeko urtekako ekintza plan egokiak zehaztu behar dira.
• Inplementazioa: diseinu fasean adostutako ekintza planak inplementatzen ditugu. Itzulpenak, taldeak dinamizatu, ikastaroak eman, motibazioa lantzeko taldeak, hizkuntza irizpideak definitu, hizkuntza politika zehaztu...
• Ebaluazioa: inplementatutakoa etengabe ebaluatu egiten dugu.
• Ekintza zuzentzaileak: ebaluaziotik hurrengo urterako ekintza planean txertatzeko modukoak diren ekintza zuzentzaileak zehazten ditugu. Honela, PDCA ziklo bat itxi eta beste berri bat hasten da.

Hizkuntza gestiorako planen faseak grafiko honetan zehaztu ditugu:

Hobeto ikusteko, handituta ikusi nahi baduzu, gainean sakatu.

Hobeto ikusteko, handituta ikusi nahi baduzu, gainean sakatu.

Zehazki diseinu fasean honako hauek egiten ditugu.

1. Lehenengo bilera koordinatzailearekin.
   • Helburua: batetik, enpresa ezagutzea eta bestetik, kanpo eta barne irudian euskara erabilera neurtzea.
2. Bigarren bilera koordinatzailearekin.
   • Helburua: batetik, kanpoko eta barruko idatzizko dokumentuetan euskararen erabilera neurtzea eta bestetik, informatika euskararen erabilera neurtzea.
3. Kontraste bilera.
   • Helburua: jasotako datuen araberako diagnostiko txostena aurkeztu eta koordinatzailearekin txosteneko datuak kontrastatu.
4. Jarraipen Batzordearen lehen bilera.
   • Helburua: Elegune aurkeztu, diagnostiko txostena aurkeztu eta AMIA matrizea osatu.
5. Jarraipen Batzordearen bigarren bilera:
   • Helburua: Helburu estrategikoak eta 2007rako ekintza plana adostu.
6. Behin betiko txostena (diagnostikoa eta diseinua) idatzi eta enpresari helarazi.

Modu honetan hizkuntzen gestioa hobetzen laguntzen diegu enpresei eta ondorioz, euskara gehiago erabiltzeko aukerak, guneak, uneak eta bideak definitzen ditugu. Hori guztia, euskara gero eta gehiago erabili dadin Azpetiko enpresen egunerokotasunean. Hala bedi.

Inprimatu