|
Elegune zentroaren sorrerak euskalgintzan
nabarmentzen diren hainbat
ahots ekarri ditu Azpeitira berriki.
Aurkezpen ekitaldian txiki geratu zen
Udaletxeko batzar aretoa, sekulako
babesa jaso baitu egitasmoak bai erakundeen
aldetik, bai enpresen aldetik.
Besteak beste, Elegune izan zuten hizpide
Eusko Jaurlaritzako Hizkuntza
Politikarako sailburuorde Patxi Baztarrikak,
diputatu nagusi Joxe Joan
Gonzalez de Txabarrik eta Andres
Urrutia euskaltzainburuak. Mahakide
izan zituzten Azpeitiko alkatea, Julian
Eizmendi, eta bidelagun izaten ari
diren enpresetako ordezkari asko.
Guztiek ekimena txalotu zuten eta
arduradunak zoriondu.
Hitzetatik ekintzetara
Andres Urrutia euskaltzainburuaren
aburuz, garaia iritsi zaigu euskara
“oztopo eta behaztopa izan beharrean,
baliabide eta komunikabidea izateko.
Herriak aspalditik erakutsi zigun
hori. Guri dagokigu, oraingo honetan,
han-hor-hemenka predikatzen dihardugun
hori praktikan jartzea”.
Eleguneren sorrera “lan eredugarritzat”
jo zuen bere aldetik Patxi Baztarrikak.
Botila erdi hutsaren edo erdi
betearen dialektika gogoko ez duela
aipatu arren, orain arte egindakoa
baino gehiago dagoela egiteko aitortu
zuen eta erronka horri erantzuteko
modu bat lan munduan euskararen
normalizazioa garatzea dela gaineratu.
Sailburuordearen hitzetan, "Biele
eta Zubiolaren esperientziak salbuespenak
dira" eta ez dugu lortuko gauetik
egunera lan mundua euskalduntzea
baina uste du "etorkizuna neurri
handi batean elebitasunarena eta
eleaniztasunarena" izango dela eta
horretan enpresak berak gizarteari
ekarpen garrantzitsua egin diezaiokeela.
Ildo beretik mintzatu zen diputatu
nagusia. Txabarrik Azpeitiko Udala eta
Euskara Patronatua zoriondu zituen
egiten ari diren lanagatik. "Hizkuntza
politikaz -esan zuen- arduratzen direnak
oso kezkatuta daude erabileraz,
esaten dute hor dagoela giltza eta
horretan asmatu beharko genukeela
hurrengo urteotan geure hizkuntza
zaharrari etorkizuna eskaini nahi
badiogu. Badute Azpeitian nora
begiratu".
- Euskalgintzaren eremuan Azpeitiak, Euskara
Patronatuaren bitartez, bide berriak jorratzen aitzindari
dela erakutsi du beste behin ere. Oraingoan, lan
munduan euskara planak garatzeko enpresei
beharrezkoak zaizkien tresna eta baliabide egokiak
esku-eskura jartzera bideratu ditu bere ahaleginak,
Elegune zentro teknikoa martxan jarriz.
- Azpeitiko Euskara Patronatuaren ekarpenak Eusko Jaurlaritzaren,
Gipuzkoako Foru Aldundiaren, Euskaltzaindiaren eta
ADEGI enpresari elkartearen babes osoa jaso du, eta
ordezkariek hitz onak baino ez zituzten izan
egitasmoaren aurkezpenean.
- Azpeitiko Udalak dagoeneko aurkeztu die Elegune
herriko 12 enpresa handienei eta denek baiezkoa
eman dute parte hartzeko proposamenaren aurrean.
Zerrenda ondorengo enpresek osatzen dute: Biele,
Zubiola, Danona, Sammic, Corrugados Azpeitia,
Grumal-Pemec, Altuna y Uria, Grual Hidraúlica,
LanMobel, Antzibar, Sarralle eta Astigarraga Kit Linek,
hain zuzen.
 | Luis Juaristi
BIELE, S.A. |
«Guretzat ez-naturala litzatekeena da bilerak erdaraz egitea»
"Biele enpresa barruan harremanak
euskaraz izaten ditugu. Ez da inposaketa
bat, natural ateratzen zaigu. Eznaturala
litzatekeena guretzat da
bilerak, esaterako, erderaz egitea. Ia
200 langile gara eta tartean badaude
erdaldunak eta denak euskaraz ikasten
ari dira. Ez dute atzean geratu
nahi. Euskara da gure hizkuntza jaiotzatik
eta euskara hori indartu nahi
dugu".
 | M. Angeles Amenabar
ZUBIOLA Kop. Elk. |
«2010ean euskara Zubiola Kooperatibako lan hizkuntza izango da»
"Definitu genuen estrategiaren arabera, 2010-
ean euskara, Zubiola Kooperatibako lan hizkuntza
izango da. Ondorioz, barne harremanak,
ahozkoak eta idatzizkoak, formalak eta informalak
euskaraz izango dira. 2010ean euskara,
Zubiola Kooperatibako zerbitzu hizkuntza gisa,
ahalik eta gehien erabiliko da. Horretarako,
Euskara Patronatura hurbildu ginen eta enpresa
erakundeek euskararen erabilera prozesuan
txertatzeko, eta aholkularitza kualifikatu baten
laguntza izan zezaten, talde tekniko bat osatzearen
aukeraren berri eman ziguten".
 | Anton Elorza
LANMOBEL Kop. Elk. |
«Lehen erronka barne komunikazioan euskara erabiltzea izango da»
"Eleguneren proposamenera atxikitzea guretzat
ematen dugun lehen urratsa da. Errazagoa
da geure kasa aritzea baino. Bestela
ez genuke asmatuko. Lehen erronka barne
komunikazioan euskara erabiltzea izango da.
Orain, iragarki-taulako mezuak elebitan ditugu
baina hortik aurrera ezer askorik ez. Espero
dugu Eleguneren laguntzarekin zerbait egitea
eta ez bakarrik gogoak jarri".
 | Josune Lazkano
ANTZIBAR |
«Diagnosi fasean gaude orain»
"Antzibarren diagnosi fasean gaude orain.
Kontzientziak esaten digu zerbait egin
beharra daukagula baina lan asko ikusten
dugu. Guk bulegoan denok euskaraz dakigu
eta euskara erabiltzen dugu, baita bileretan
ere. Beste kontu bat da kanpo komunikazioa.
Inprimaki gehienak elebitan ditugu
baina eskutitz formal bat bidali behar
badugu, adibidez, normalean erdarara jotzen
dugu eta horretan, uste dut, beharko
dugula laguntza gehien".
 | J. Mari Garate eta Patxi Agirrazabal
DANONA Kop. Elk. |
«Konturatu gara itzuli ez, sortu egin behar dugula euskaraz»
"Momentu honetan gestio eredu aldaketa
prozesu batean sartuak gaude eta euskara
plana indar gutxirekin daukagu baina indartzeko
asmoa dugu. Duela bost urte hasi ginen
euskarari heltzen. Guk laguntza behar dugu
itzulketetarako, adibidez. Orain arte, piezak
ziren "costados", "cuerpos"… eta orain dira
"alboak" eta "gorputzak". Bide paralelo bat
egin dugu baina konturatu gara itzuli ez, euskaraz
sortu behar dugula. Balio erantsi bat
baino, guretzat euskara hizkuntza eskubide
baten betetzea da".
Dokumentu interesgarriak (irakurtzeko gainean sakatu)
Dokumentu interesgarriak (irakurtzeko gainean sakatu)
Ildo bereko artikuluak (irakurtzeko gainean sakatu)
|
