Ainhoa Beristain eta Mari Jose Iturria Azpeitiko Udaleko Euskara batzordeburuek eta Rober Gutiérrez Ziurtagiriaren Elkarteko zuzendariak banatu zituzten atzo (2012-1-12) Bai Euskarari Ziurtagiriak. Ekitaldia Sanagustin kulturgunean izan zen eta guztira Azpeitiko 47 enpresa, komertzio eta era guztietako entitatek jaso zuten Ziurtagiria. Atzo eguerdiko banaketa ekitaldiak bi urteko sustapen lanari amaiera eman zion.

Euskararen Egunaren bezperan, euskararen aurrerabidean emandako beste pauso txiki baten berri eman dugu Azpeitian "Euskara gu guztion aho-belarrietan" adierazpen instituzionalaren bidez. Hemendik aurrera, Udaletxeko telefono guztiek, 200 inguruk, euskaraz bakarrik hitz egingo dute.

Nafarroako udal gutxi batzuek ekin zioten orain dela 13 urte Euskarazko Produktuen Katalogoa banatzeari. Urtez urte ekimena zabaldu egin da eta, aurten, Euskal Herri osoko 200 udaletan baino gehiagotan banatuko da; guztira 200.000 ale eta, horietatik, Azpeitian 5.000 ale banatuko dituzte.

Azpeitiko Udalak eta Badihardugu Euskara Elkarteak hiru urteko lanaren azken emaitza aurkeztuz itxi dute 2009an elkarrekin abian jarri zuten ekimena. Azpeitiko ahozko ondarearen artxibo zabal, antolatu eta aberatsa sarean dago jada, nahi eta behar duen ororen eskura.

Azpeitiko Euskararen Mahaiak legealdi berriko aurreneko bilera azaroaren 7an egingo du, 18:30ean, Euskara Patronatuaren egoitzan. Azpeitiko euskara politika azpeitiarren parte-hartzearekin egin nahi du Udalak, eta Euskararen Mahaian parte hartu nahi duen ororentzat zabalik daude ateak.

Gaur zortzi (2011-10-21) aurkeztutako egitasmoaren barruan aurreikusi bezala, Azpeitian hitanoa landu eta bultzatzeko ekimenean parte hartuko duten ikasleen gurasoei zuzendutako saioa egin zuten atzo (2011-10-27) Euskara Patronatuan.

Azpeitiko Euskara Patronatuak, Mintzola Fundazioak eta herriko ikastetxeek Azpeitian hitanoa landu eta bultzatzeko mamitu duten egitasmoa gaur (2011-10-21) aurkeztu dute Azpeitiko Sanagustin kulturgunean. 2011-2012 ikasturte honetan DBHko 3. eta 4. mailetako ikasleekin landuko dutena egitasmoaren hasiera besterik ez da izango.

Euskara ikasi edota maila hobetzeko asmoa duenak aurten ere ez du aitzakiarik izango Azpeitiko Udal Euskaltegian. 2011-2012 ikasturterako izen-emate epea zabalik dago, irailaren 30a arte. 30 ikastarotik gora jarriko ditu aukeran aurten ere Udal Euskaltegiak, 4. mailakoa tartean dela.

Aurten ere Azpeitiko Udal Euskaltegiak ekaina-uztaila bitartean EGA titulua eta bere baliokidea den HABEren 3. mailakoa eskuratu ahal izateko ikastaroak egiteko aukera eskainiko du. Beraz, Euskaltegian izena ematen duten ikasleek euren beharren arabera, ikastaro bera bi garaitan egiteko aukera izango dute. Izena lehenbailehen ematea komeni da.

Azpeitiko Udalak, Euskara Patronatuaren bidez, kanpaina jarri du abian, 2010eko errenta aitorpena egin behar duten azpeitiarrak aitorpena euskaraz egitera gonbidatuz.