Euskara ikasteko dirulaguntzak
Euskara ikasi nahi baduzu ez kezkatu ordaindu behar duzunaz, izan ere, Azpeitiko Udal Euskaltegiak urtero-urtero beka zein dirulaguntza ugari ematen ditu, ikasle guztiek euskara ikasteko erraztasunak izan ditzaten.
Diru sarreren araberako beka:
Beka hau jaso ahal izateko, errenta-aitorpenean azaltzen den diru-sarrera netoa hartuko da oinarritzat eta etxean diru horretatik bizi zaretenon artean zatiketa egiten da. Zatiketa eginda 6.010,12 euro edo gutxiago ateratzen bada etxeko bakoitzarentzat, %50 gutxiago ordainduko duzu. Zatiketa horrek 6.010,12 eta 6,611,13 euro artean ematen badizu, matrikula ordaintzerakoan %25 gutxiago ordainduko duzu.
Adibidea: eman dezagun etxe batean aita, ama eta hiru seme-alaba bizi direla, eta etxe horretan aurreko urtean 30.050, 61 euro neto sartu direla. Zatiketa egingo dugu:
30.050,61:5= 6.010,12 euro etxeko bakoitzarentzat.
Beraz %50eko beka dagokio pertsona horri. Horrek esan nahi du matrikula osoa ordaindu beharrean erdia bakarrik ordaindu beharko duela.
Beka hau eskatzeko, honako agiriak ekarri behar dituzu Euskaltegira urriaren 30a baino lehen:
- Errenta-aitorpenaren fotokopia (aurreko urteko errentarena).
- Bizikidetzaren-ziurtagiria ("certificado de convivencia"). Agiri hau udaletxean eskatu. Bertan azaldu behar du non bizi zaren eta norekin (guraso eta anai-arrebak, senarra/emaztea eta seme-alabak...).
- Beka eskatzeko orria bete HEMEN
Asistentzia beka:
Beka hau ikasturte amaieran emango zaizue Euskaltegiko ikasle guztioi, baldintza bakarra betetzen baduzue: %85eko asistentzia erreala izatea ikasturtean zehar. Nahiz eta faltak justifikatuak izan, asistentzia-falta gisa hartuko dira. Baldintza hau betez gero, Euskaltegiak benetan ordaindu duzun matrikula oso-osorik itzuliko dizu. Asistentzia kontrolatzeko, irakasleak emango dizun asistentzia-orri bat sinatu beharko duzu egunero
Etxe beretik kide bat baino gehiago
Etxe beretik kide bat baino gehiago etortzen bada, batek matrikula osoa ordainduko du eta besteak erdia (%50). Gainera, biek eska ditzakete aurrez adierazitako bekak. Baina kontuan izan pertsona horiek familia-unitate bakarrean (errenta aitorpen bakarrean) sartuta egon behar dutela.
|
